瑞士「最強小腿」　包辦瑞士44%大賽入波

瑞士近年係國際大賽常客，梳頓沙基利呢個名亦深入民心，雖然佢2年前已離開歐洲去美職掘金，不過歐國盃仍然係佢舞台，周四(20日)凌晨對蘇格蘭轟入世界波，係佢連續6屆國際大賽入波，包辦瑞士喺6屆賽事入面44%入球！

曾效力利物浦嘅梳頓沙基利，向來以超級粗壯嘅小腿聞名，2年前轉戰美職加盟芝加哥火燄，但喺國家隊仍然擔任重要角色，今場入波令佢喺14年世界盃(3球)、16年歐國盃(1球)、18年世界盃(1球)、20年歐國盃(3球)、22年世界盃(1球)同24年歐國盃(1球)，連續6屆國際大賽都有入球紀錄。

瑞士喺呢6屆賽事入面攻入32球，梳頓沙基利一人就貢獻10個入波同4次助攻，獨力包辦球隊近44%入波。另外，今場遠射係佢歷來第3個歐國盃禁區外入波，係歐國盃史上第2「遠射王」，僅次於法國傳奇柏天尼(4球)。