拿高斯文達續約「最低消費」　激吻女友慶祝

德國喺歐國盃連贏2場後，提前鎖定16強資格，連續5屆歐國盃進身淘汰賽。德國出線亦達成今屆「最低消費」，足總證實領隊拿高斯文合約內嘅續約條款正式啟動，佢將會帶領德國踢埋2026年世界盃。

其實早喺4月份，德國足總已宣布同拿高斯文續約2年，不過當中有個附帶條款，係德國必須要喺歐國盃分組賽出線，隨住呢個「最低消費」達成，拿高斯文嘅新合約亦正式落實。呢位36歲少帥賽後表示：「我哋目標係3分，亦順利拎到，每個球員都願意付出，呢個係好好嘅徵兆，我好滿意。」

今次係德國自2012年後首次喺歐國盃開局2連勝，亦係球隊史上第5次，之前4次德國有3次最終拎到冠軍(1972年、1980年、1996年)，似乎係冠軍好兆頭。拿高斯文賽後更走上看台，同女友Lena Wurzenberger激吻慶祝。