麥湯米尼搶鏡　蘇格蘭有入波「麥」碼

蘇格蘭喺A組第2輪1比1打和瑞士，表現比起首仗大有進步，其中效力曼聯嘅麥湯米尼非常搶鏡，全場跑動距離高達11.86公里，而且有4次射門同2次關鍵傳球，並射入個人首個歐國盃入波。

麥湯米尼入波嘅射門本來威脅唔大，但法比安舒哈「多腳」閂入，最初歐洲足協判烏龍波，後來改判畀麥湯米尼，呢位中場賽後表示：「呢球唔係烏龍波，因為射門係中目標，下半場我仲有一球窩利唔好彩省中人，如果唔係都會係個入球。」

有趣嘅係，呢球係蘇格蘭歷來喺歐國盃第7個入波，除上場靠德國魯迪格擺烏龍外，另外6個入球者全部都係「麥」字頭，包括麥亞里士打(Gary McAllister)、麥史地(Paul McStay)、麥佳亞(Brian McClair)、麥哥斯特(Ally McCoist)、卡林麥基哥(Callum McGregor)同麥湯米尼(Scott McTominay)。