VAR爭議！匈牙利主帥諷德國獲「關照」

德國喺歐國盃第2輪2比0贏匈牙利，開紀錄嘅入波引起爭議，當時根度簡禁區內撞跌韋利柯賓，再助攻穆斯亞拿入波，VAR檢查後認為根度簡並冇犯規，匈牙利領隊馬高羅斯賽後炮轟球證執法，諷刺德國獲VAR「關照」。

馬高羅斯賽後表示：「我從來冇試過投訴球證，但今日球證實在太差，佢覺得根度簡推人冇犯規，但下半場我哋就被吹罰。德國點都會贏呢場波，球證就係場上表現最差嘅人，我好有興趣知道當德國對住法國呢類強隊，咁樣嘅犯規會唔會被吹罰。」

不過，主角之一嘅根度簡就唔係咁睇：「我好驚訝見到匈牙利球員憤怒嘅反應，我唔知喺電視睇嘅畫面係點，但我喺英超踢過7年，如果咁樣嘅動作喺英超被判犯規，相信全世界人都會笑到碌喺地下！」