大師級表現　卻奧斯一項數據歐國盃史上第二

德國喺歐國盃以2比0擊敗匈牙利，老將卻奧斯又有超卓演出，全場131次傳球有124次成功交畀隊友，歐國盃史上僅次於2012年西班牙對愛爾蘭，沙維單場127次成功傳球，堪稱大師級表現。無奈卻奧斯已決定今屆賽事結束後掛靴，實在令人惋惜。

雖然卻奧斯今場冇入波或者助攻，但佢喺組織串聯工作方面發揮重要作用，上半場就有72次傳球，70次成功交畀隊友。由於卻奧斯傳球能力出眾，令德國上半場有72%控球率，8次射門有3次中目標，控制大局。

換邊之後，卻奧斯繼續有穩定發揮，並踢足全場，令對手無力翻身。34歲嘅卻奧斯係皇馬奪得上季西甲及歐聯冠軍嘅功臣，佢喺上屆歐國盃後一度宣布退休出國家隊，直至今年2月決定重返「日耳曼兵團」，希望協助德國以東道主身份爭標，證明仍然有心有力，普遍輿論認為呢位「傳球大師」仍處顛峰水平，未免太早決定退役。