心碎！莫迪歷喪跑10.9公里獨力難支

克羅地亞繼歐國盃首仗吞西班牙3蛋後，第2場對阿爾巴尼亞再次失分僅和2比2，38歲中場莫迪歷今仗搏埋老命，全場狂跑10.9公里兼交出過百次傳送，完場後筋疲力盡嘅佢黯然坐喺球場上一幕，令球迷心碎。

莫迪歷今場跑動距離達10.9公里係全隊第2多，對一位38歲老將嚟講相當唔簡單，而且佢今場有108次成功傳球，係歐國盃史上錄得「100+」傳球最大年紀球員，可惜一眾隊友都唔爭氣，令克羅地亞面臨出局危機。

莫迪歷賽後表示：「我哋已別無選擇，最後一場一定要擊敗意大利。今場我哋好早失波，調整後本來效果好好，但最後5至10分鐘唔知點解突然退縮，最終失守。意大利係支好強球隊，有好球員同領隊，但命運仍然掌握喺我哋自己手上，我哋知道要點做。」