後備上陣擺烏龍+入波　加素拿創大賽紀錄

阿爾巴尼亞中場卡奧斯加素拿喺周三(19日)晚歐國盃對克羅地亞，擺完烏龍之後，補時入波協助球隊逼和對手2比2，並創造一項紀錄，成為國際大賽(世界盃及歐國盃)史上第1位後備上陣擺烏龍兼入波嘅球員，呢位34歲老將喺球員生涯尾聲，可以載入史冊都算無憾。

卡奧斯加素拿72分鐘後備上陣，點知4分鐘後擺烏龍，導致阿爾巴尼亞落後1比2，眼見面臨再輸1場，呢位上季效力達斯泰特嘅球員喺補時5分鐘建功，為球隊驚險執番1分，保持出線希望。

卡奧斯加素拿亦成為繼1976年捷克球員安度斯之後，歐國盃史上第2位單場擺烏龍及入波嘅球員，更加係歐國盃及世界盃史上，第1位做出呢項「壯舉」嘅後備上陣球員。此外，卡奧斯加素拿取得1烏龍及1入波之後，終於令今屆賽事首次有球員入球「2+」。

達斯泰特喺剛過去球季排德甲包尾降班，卡奧斯加素拿亦宣布以自由身離隊，現時仍然未有球會收留，經此一役之後，或者會吸引唔少球會關注。