麥巴比復操　或臨陣決定是否上陣鬥荷蘭

法國球星基利安麥巴比上場歐國盃對奧地利撞爆鼻，出現鼻樑骨折，呢位25歲射手已經可以參加操練，至於能否出戰周六(22日)凌晨對荷蘭，可能要等到最後一刻先至決定。

法國喺當地時間周三(19日)下午進行操練，基利安麥巴比亦有出席，見佢到鼻上貼有繃帶，神情輕鬆，同領隊迪甘斯有講有笑。麥巴比做完跑步等體能訓練之後，亦有參加射門練習。

根據法國《隊報》爆料，雖然多方消息指基利安麥巴比無法上陣對荷蘭，但隨住佢參加操練，仍然有上陣機會，並會試戴面罩比賽。

迪甘斯話：「就算麥巴比唔會立即做手術，但相信歐國盃結束後，都係需要開刀，佢嘅傷勢已經有好轉，我哋會繼續密切觀察。」一般估計法國對荷蘭，基利安麥巴比可能先做後備，必要時再派佢上陣搏殺。