克阿球迷發種族仇恨口號　塞爾維亞揚言退出

周四（20日）歐國盃C組塞爾維亞對斯洛文尼亞前夕，塞國足總就克羅地亞及阿爾巴尼亞球迷發出種族仇恨口號而投訴，若然歐洲足協唔作出處罰，佢哋唔排除會退賽。

事緣係周三（19日）歐國盃B組次輪阿爾巴尼亞逼和克羅地亞2比2之役，由於大家都與塞爾維亞有好大仇口，呢兩支巴爾幹球隊嘅球迷，喺下半場59分鐘時不斷高呼「殺呀，殺呀，殺死塞爾維亞人」。相關影片曾經被上載到社交媒體X，不過好快已經被下架。

塞爾維亞足總指摘佢哋行為可恥，並要求歐洲足協嚴懲兩軍，若果歐洲足協唔採取行為，佢哋就準備退出今屆賽事。假如塞爾維亞喺尾輪對丹麥前退賽，根據規例除咗會被判輸0比3外，仲要罰錢添。