斯洛伐克靠「友情力量」　杜巴夫卡無懼被棄

斯洛伐克上場1比0擊敗比利時，表現令人刮目相看，35歲門將杜巴夫卡表現穩健，雖然盛傳佢將會被紐卡素放棄，不過杜巴夫卡就話唔會理會去留傳聞，揚言「友情力量」會幫斯洛伐克走得更遠。

杜巴夫卡喺贏比利時後透露：「比利時有更好球員，但斯洛伐克係更好團隊，我哋已經合作多年，而且大家都係好好朋友，我同幾個隊友都有去史堅尼亞嘅婚禮，我哋呢個團隊好緊密，希望可以搶更多分數晉級。」

杜巴夫卡上季喺紐卡素，因尼克普比重傷已擔正，不過傳聞紐卡素已四出收購新龍門，杜巴夫卡表示：「踢歐國盃機會唔係成日有，我依家只會專注賽事，紐卡素簽咩人我都係睇新聞講，老實講我唔在乎，我嘗試令腦入面只係得歐國盃。」