禾巴克服烏龍波陰影　笑對網民抽水

奧地利喺歐國盃首仗0比1輸畀法國，力戰而敗嘅表現獲得好評，不過擺烏龍嘅「罪人」禾巴就受到攻擊。呢位效力慕遜加柏嘅球星喺對波蘭前，表示自己已經克服「烏龍陰影」。

禾巴表示：「經過第1晚失眠後，我依家已經去到可以睇住啲抽水留言同改圖都識笑嘅階段。當你上場成為國家大蠢材，即刻有另一場波畀你扭轉係好事，我要證明自己同球隊都可以踢得好好多！」

奧地利領隊蘭歷克同樣表示，球員間冇互相指摘好重要：「所有球員、職員都知道禾巴嘅事件只係不幸，冇人會指摘任何人，更重要係禾巴唔好怪責自己，我哋對住法國都冇畀對手入波，係值得自豪。」