轉會專家爆料：阿積士斟掂韋格賀斯

荷蘭前鋒韋格賀斯上場歐國盃後備上陣，射入致勝1球，協助「橙衣兵團」擊敗波蘭，盡顯功架，根據「轉會權威」記者羅曼諾(Fabrizio Romano)爆料，阿積士已接近同呢位31歲射手達成加盟協議，意味佢好大機會相隔6年後，重返荷甲比賽。

據悉阿積士方面同韋格賀斯嘅經理人團隊談判後，基本上已就個人待遇條款達成協議，雙方都有信心可以完成簽約，阿積士嚟緊會重點同韋格賀斯所屬球會般尼傾轉會費問題。

般尼早已無意留用呢位高大中鋒，近年先後將佢外借去比錫達斯、曼聯、賀芬咸，既然阿積士願意接貨，相信般尼會平價出售。

韋格賀斯上季為賀芬咸踢28場聯賽入7球，入球率唔算高，但佢6月3次為荷蘭披甲都取得入球，腳風非常順，以佢嘅級數應付荷甲賽事綽綽有餘。韋格賀斯喺荷乙球隊安曼出道，之後效力過2支荷甲球隊荷華高斯、阿爾克馬爾，2018年夏天加盟禾夫斯堡，展開外流生涯，依家又準備返回祖家搵食。