37歲基奧特頂替麥巴比　重演世盃數胡好戲

法國射手基利安麥巴比上場歐國盃撞爆鼻，盛傳餘下2場分組賽都無法披甲，預料會由基奧特頂替佢嘅正選位置。呢位37歲老將已表明賽事結束後，就會退出國家隊，並去美職搵食，加盟FC洛杉磯，依家正好畀機會佢綻放餘輝。

法國近年盛產翼鋒，缺乏正前鋒，擅長踢左翼嘅基利安麥巴比焗住客串中鋒，佢受傷後，屬於傳統中鋒嘅基奧特機會來了，預料順理成章擔正。雖然基奧特已踏入「掛靴年齡」，但狀態仍然不俗，上季意甲上陣35場入15球，創下效力AC米蘭3季以來，單季最多聯賽入波。

此外，基奧特上屆世界盃有4球進帳，僅次於基利安麥巴比同美斯，可見佢踢大賽水準可靠。基奧特以57球位居法國隊史上神射手，已捧過世界盃冠軍，佢表示2016年歐國盃決賽，法國不敵葡萄牙成為佢球員生涯最大遺憾，渴望一嘗歐國盃冠軍滋味圓夢，一定要幫球隊贏波及晉級，等埋麥巴比復出衝冠。