西班牙擁最強雙翼　瘋狂爆破扭到你暈

西班牙成為今屆第2支晉級球隊，連贏克羅地亞同意大利都有出色表現，當中最搶鏡無疑係一對飛翼，左翼尼高拉斯威廉斯同右翼耶馬係今屆扭波次數最多前2名，瘋狂爆破扭到對手暈陀陀！

21歲嘅尼高拉斯威廉斯今場左路瘋狂突破，11次嘗試扭波並創造4次機會，製造烏龍波兼曾射門中楣，獲選為今場最佳球員。呢位畢爾包新星亦滿意自己表現：「今場係我喺西班牙國家隊最全面嘅表現，希望只係個開始。返到更衣室隊友為我鼓掌，多謝佢哋嘅幫助，希望我屋企人都好似我一樣咁享受今場比賽。」

上場表現光芒四射嘅耶馬，今仗6次扭波亦有4次成功，呢位16歲「神童」目前以7次成功扭波，暫列今屆「扭波王」第1位，排第2就係尼高拉斯威廉斯同謝利美杜古(6次)，西班牙呢對翼鋒將係佢哋爭逐冠軍最大武器。