當拿隆馬8次撲救都輸　對克羅地亞決生死

意大利喺死亡B組被西班牙全場圍攻，門將基安盧基當拿隆馬作出8次撲救，力挽狂瀾嘅演出阻止唔到球隊輸波，依家2戰3分排喺第2位，最後一輪對克羅地亞變成生死戰。

當拿隆馬今場屢救險球，包括尾段封出艾約斯佩雷斯嘅單刀，統計顯示佢今場有8次撲救，係自2000年歐國盃托度嘅10次撲救後，意大利歐國盃史上單場第2多撲救門將。

當拿隆馬賽後表示：「我哋交失太多簡單嘅傳球，當你出現咁多犯錯，對手就會懲罰你，我哋對自己表現覺得好憤怒。」

意大利下場對克羅地亞要贏波先肯定出線，當拿隆馬就話：「出線命運仍然掌握喺手上，唔需要太憂慮，我哋有信心可以做到。」