美斯破紀錄美洲盃35次上陣　阿根廷兩蛋贈加拿大

周五(21日)早上美洲國家盃揭幕戰，上屆冠軍阿根廷以2比0擊敗加拿大，成功打響頭炮。球王美斯破紀錄第35次喺美洲盃上陣，超越已故智利名宿利雲史東，成為呢項賽事史上上陣次數最多嘅球員。不過，美斯喺歷史性時刻表現一般，錯失2次單刀機會，最後僅貢獻1次助攻。

雙方實力相距懸殊，阿根廷一開波就搶攻，柏利迪斯、迪馬利亞、阿歷斯麥亞里士打、美斯等球星先後攻門，都無功而還，上半場互交白卷。

換邊後僅4分鐘，阿根廷迅速打開紀錄，阿歷斯麥亞里士打喺對方門將出迎之際及時橫傳，由祖利安艾華利斯窄角度射入。

其後阿根廷繼續創造大量攻勢，美斯有2次單刀機會，先係起腳被門將撲出後，自己修正再射門，又遭對手護空門。79分鐘，美斯再次單刀殺入禁區，巧妙挑射已經笠過門將，但卻斜出。

美斯腳風唔順，改為策動攻勢有收穫，88分鐘直傳畀拿達路馬天尼斯射成2比0。阿根廷贏波之後將於下周三(26日)早上踢A組第2輪對智利。