洛迪「洗牌」下場停賽　富安迪暗示出後備

西班牙喺B組兩戰全勝提早鎖定首名出線，最後一輪對阿爾巴尼亞變成例行公事，領隊富安迪賽後表明將會作出輪換，畀部份副選有落場機會，而中場核心洛迪卡斯簡迪就因累積2面黃牌，揀啱時間坐波監。

洛迪卡斯簡迪今場繼續做西班牙核心，全場58次前場傳送100%成功，係自1980年歐國盃後，成功率100%嘅前場傳送最多球員。或者因為踢得太輕鬆，首仗已有黃牌嘅佢，喺完半場前多口向球證投訴而再食黃牌，下輪將要自動停賽，對於肯定首名出線嘅西班牙嚟講，呢場波監絕對係「坐得及時」。

西班牙領隊富安迪賽後亦表明打算喺下場留力：「我哋可能會換個新面貌，畀機會一啲一直坐喺後備席嘅好球員。西班牙係團隊優先，狀態好嘅球員上陣，對阿爾巴尼亞一樣會有支強大球隊上場爭勝。」