史巴列堤認衰：意大利體力精神都輸

意大利喺歐國盃雖然僅因1球烏龍波，0比1不敵西班牙，但比賽過程陷入絕對劣勢，全場只得4次射門，1次中目標，反觀西班牙多達20次射門，並有9次中目標，賽後意大利領隊史巴列堤表示輸得口服心服，承認球隊體力上及精神上都不如對手。

史巴列堤話：「我對賽果並唔失望，因為西班牙表現的確比較好，體力上及精神上都遠勝我哋，我哋跟唔上對方比賽節奏，由一開始已經處於困境。」此外，史巴列堤排陣及調動都引起爭議，右後衞迪羅倫素狀態低迷，多次被對手尼高拉斯威廉斯突破，意大利中堅卡拉科利擺烏龍，就係來自尼高拉斯威廉斯嘅傳中波。不過，史巴列堤仍然畀呢位昔日拿玻里愛將踢足全場，令意大利防線繼續暴露於風險之中。

國際米蘭等多支意甲勁旅都採用3中堅陣式，史巴列堤早前熱身賽亦有試用，效果不俗，但歐國盃展開後，佢堅持用番4231陣式，結果兩場表現都欠佳，如果呢位「光頭佬」第3場對克羅地亞，仍然唔作出調整，恐怕意大利隨時會輸波出局。