意大利相隔18年再現大賽烏龍波　竟然係捧盃吉兆？

意大利新晉中堅卡拉科利喺上場歐國盃擺烏龍，成為「藍衣兵團」喺國際大賽決賽周(世界盃及歐國盃)史上第2次出現烏龍波，對上一次係2006年世界盃，當年意大利最後奪得冠軍，莫非呢球烏龍波係捧盃吉兆？

根據歷史統計，卡拉科利係意大利出戰歷屆歐國盃以來，首位擺烏龍嘅球員，如果計埋世界盃，屬於第2位。2006年世界盃分組賽意大利對美國，薩卡度解圍失誤變成擺烏龍，連累球隊被逼和1比1，最巧合當年賽事都係由德國主辦，難怪唔少網民認為意大利喺「福地」擺烏龍，反而可能係好事。

不過，意大利2006年世界盃以不敗姿態奪冠，但今屆歐國盃踢第2場就輸波，恐怕難以重溫18年前好夢。