巴治奧睇歐國盃遭持槍打劫　頭部受傷縫針

根據英國《每日郵報》爆料，意大利名宿巴治奧喺家中觀看歐國盃西班牙對意大利直播期間，遭持槍賊人入屋打劫，糾纏期間，被賊人用槍柄打傷頭部，需要入院治療。

現年57歲嘅巴治奧居住意大利北部小鎮，當地時間晚上10點，有5名匪徒持槍入屋打劫，巴治奧試圖反抗，被人用槍柄打傷頭部，匪徒將巴治奧及其家人鎖入房內，繼而搜掠屋內財物，包括手錶、珠寶、現金，實際損失仍然有待點算，據悉賊人喺屋內逗留超過40分鐘先至離開。

事後巴治奧同家人自行破門，離開房間尋求協助，佢已經入院治療，傷口需要縫針，幸好冇生命危險，算係不幸之中嘅大幸。