拉素加入爭奪戰　3000萬鎊搶格連活特

繼祖雲達斯想收購曼聯翼鋒格連活特之後，另一支意甲球隊拉素亦加入爭奪戰，根據歐洲各大媒體報道，拉素開出3,000萬鎊(約2.96億港元)轉會費，收購呢位22歲英格蘭新星，兩間球會已經展開談判。

據悉拉素初步開出3,000萬鎊轉會費，有可能再加入浮動轉會費，根據格連活特表現，向紅魔鬼支付額外獎金。英國《每日郵報》指，兩間球會談判結果正面，有機會達成交易協議。

不過，另外有消息指曼聯最起碼要求4,000萬鎊(約3.95億港元)轉會費，拉素財政上能否負擔到，成為疑問。

格連活特上季被曼聯外借去西甲球隊基達菲，各項賽事上陣36場入10球，佢同紅魔鬼嘅合約將於明夏屆滿，雖然曼聯有權自動同佢續約1年，但會方無意咁做，寧願今夏出售格連活特套現。