艾達古拿決戰大師兄　下季將被皇馬外借

土耳其喺歐國盃首戰對格魯吉亞一鳴驚人，19歲新星艾達古拿射入靚波破紀錄。第2場對葡萄牙，艾達古拿將會面對兩位皇馬殿堂級球員C朗拿度同比比，兩代交鋒令人期待。

艾達古拿上場入波，打破C朗保持嘅歐國盃最年輕首演入波紀錄，C朗喺04年歐國盃首次入波嗰陣仲未出世，而今場將會盯防艾達古拿嘅41歲中堅比比，2007年簽約加盟皇家馬德里嗰陣，艾達古拿亦只係個2歲BB。

皇馬教練安察洛堤早前表明會留低艾達古拿，不過佢喺歐國盃上位後情況有變，據西班牙《阿斯報》報道，皇馬知道唔可以阻礙呢位新星發展，而下季皇馬有基利安麥巴比同恩迪克加盟，本身又有雲尼斯奧斯祖利亞同洛迪高高斯等前鋒，艾達古拿上陣機會有限，所以計劃畀佢外借，而皇家蘇斯達就係首選，因為皇馬之前曾經外借馬田奧迪加特同久保健英去皇蘇，成效顯著，所以屬意將艾達古拿借去皇蘇磨練。