比利時鋒線啞火　奧賓達有望上位做救星

比利時鋒線啞火，包括世界盃在內，近3場國際大賽決賽周都冇波入，但其實呢支「歐洲紅魔」不乏射手，效力RB萊比錫嘅奧賓達上季德甲轟入24球，愈來愈多聲音要求畀呢位24歲前鋒擔正。

比利時正選前鋒盧卡古上場兩次入波食詐胡，認真黑仔，延續大戰隱形頹勢，下場生死戰對羅馬尼亞，主帥泰迪斯高有必要變陣，奧賓達有望獲得正選。呢位前鋒雖然身材遠不及盧卡古高大，但勝在速度快，走位靈活，入球數字穩定，2022/23年球季效力朗斯，踢38場法甲入21球，上季轉投RB萊比錫後，上陣34場德甲入24球，僅次於哈利卡尼(36球)及古拉斯(28球)。

奧賓達比盧卡古最大優勝之處係遇強愈強，今屆歐聯分組賽2次鬥曼城，合共轟入3球，因而引起曼聯、巴塞隆拿等大球會關注。奧賓達上場歐國盃84分鐘後備上陣，幾乎貢獻助攻，但始終唔夠時間畀佢表演，如果領隊泰迪斯高今場用奧賓達代替上場犯錯導致失波嘅謝利美杜古，或者會有更佳效果。