蘭歷克創生涯最高勝率　唔怕「跌眼鏡」

德國戰術大師蘭歷克，2年幾前執教曼聯「英名盡喪」，不過依家帶領奧地利就成功谷底反彈，歐國盃3比1擊敗波蘭後，佢執教奧地利勝率達到60%，創下個人生涯新高，賽後更表示唔怕「跌眼鏡」！

蘭歷克接掌奧地利後，成功注入前場逼搶同侵略性打法，今場佢嘅調動更令球隊贏波。蘭歷克執教生涯接近40年，上一份工喺曼聯勝率只得37.93%，陷入個人新低，估唔到依家執教奧地利，25場賽事拎到第15勝，60%勝率創下個人生涯新高。

蘭歷克賽後表示：「老實講上半場表現麻麻，有幾個球員都喺水準以下，我哋陣容唔係超級豪華，唔能夠承受4、5個球員踢唔出水準，所以半場一定要變，我同巴姆加特拿傾咗好耐，佢對球隊好重要，我哋需要佢踢番好。」

奧地利下半場就由入替嘅阿歷山大柏拉斯助攻巴姆加特拿建功，入波後巴姆加特拿興奮捉住蘭歷克塊面慶祝，搞到蘭歷克眼鏡都跌埋，呢位前曼聯領隊表示：「我副眼鏡仲喺度，而且我仲有兩副後備，跌咗都唔驚！」