簡迪又攞MVP　法國創「尷尬紀錄」

周六(22日)凌晨歐國盃D組大戰，荷蘭同法國打和0比0，賽後法國中場尼高路簡迪當選今場最佳球員，亦係呢位33歲老將連續2場獲此殊榮，果然老而彌堅。

尼高路簡迪今場傳球成功率高達90%，包括3次關鍵傳球，並有2次搶斷。歐洲足協官方對呢位防中給予高度評價：「簡迪喺整場比賽防守毫無破綻，進攻方面亦為法國作出重要貢獻。」法國隊官方社交網上載尼高路簡迪攞2場最佳球員嘅相片，話：「第1場MVP，第2場MVP，第3場會係邊個呢？」

至於尼高路簡迪接受訪問時話：「整體來講，我哋踢咗1場好好比賽，比上1場更好，比較失望係冇波入，我哋正朝向正確方面進發。」值得一提，法國第1場分組賽靠對手擺烏龍，以1比0擊敗奧地利，加上今場打和荷蘭0比0，成為歐國盃史上第1隊首2場分組賽冇球員入波，卻有4分嘅球隊，同時亦係法國史上首次單屆歐國盃頭2場冇球員入波。