阿拿奧杜域名留青史　入波獻病父

奧地利喺歐國盃3比1擊敗波蘭，射入12碼嘅35歲老將阿拿奧杜域名留青史，成為奧地利史上大賽第2老入波球員，佢賽後表示患病父親同家人都有入場睇波，將呢個入波獻畀佢哋。

效力國際米蘭嘅阿拿奧杜域老而彌堅，今仗射入12碼鎖定3比1勝局，同射入第2球嘅巴姆加特拿都係連續2屆歐國盃入波，而阿拿奧杜域更以35歲63日之齡，成為奧地利史上大賽第2老入波球員，僅次於08年歐國盃入波嘅名將華斯迪(38歲257日)。

阿拿奧杜域賽後表示：「入波令我感動，我爸爸身體出咗啲問題，佢今日有喺現場睇波，一切都恢復正常，我嘅老婆、兒子、兄弟都有入場，遺憾媽媽冇嚟到，只係喺屋企睇直播。好多人話我太老，適應唔到蘭歷克嘅戰術，但我覺得唔係，我好享受成為奧地利國家隊一員。」