阿根廷主帥賴地硬：草皮太差累美斯單刀失機

阿根廷上場美洲國家盃A組揭幕戰以2比0擊敗加拿大，但領隊史卡朗尼並唔滿意，嫌贏得少，並歸咎於主辦國美國嘅球場草皮質素太差，導致球王美斯錯失2球單刀波。

阿根廷上場有4次單刀唔入，包括美斯有2次失機，賽後史卡朗尼話：「7個月前我已經講過，揭幕戰球場當時仲唔換草皮，直至開賽前2日先至鋪上部分天然草，導致傳波時，皮球滾動速度變慢，呢個球場唔適合用來舉行大賽。」中堅基斯甸羅美路指呢種惡劣質素嘅草皮，容易令球員受傷。

至於周六(22日)早上舉行嘅美洲國家盃A組另一場，秘魯同智利打和0比0，雙方冇波入，未知是否又係受草皮問題影響呢？