甘美治去意已決　下季跟哥迪奧拿搵食？

根據《天空體育》爆料，德國右後衞甘美治無意同拜仁慕尼黑續約，會方為免明年約滿人財兩失，決定今夏提早出售呢位29歲「全能戰士」，曼城成為最大潛在買家。

甘美治只剩下1年合約，但遲遲未同拜仁慕尼黑達成續約協議，擺明想走人，引起曼城、阿仙奴、巴塞隆拿等大球會興趣。據悉拜仁深知難以留住甘美治，對於出售佢持開放態度，會方希望從中收取5,000萬歐元(約4.2億港元)轉會費，預料等歐國盃結束之後，就會啟動轉會工作。

盛傳阿仙奴曾經透過另一位德國國腳夏維斯「邀請」甘美治加盟，但曼城領隊哥迪奧拿亦有意簽入甘美治，哥帥執教拜仁慕尼黑時期，曾經同甘美治合作過，哥迪奧拿喜歡將左右二閘推前當防守中場使用，甘美治同時勝任呢兩個位置，非常適合哥帥嘅戰術，兩人的確有機會再次拍住上。