神獸預測意見一致　德國贏唔到瑞士！

歐國盃東道主德國已出線16強，最後一輪對瑞士要為首名而戰，不過一眾德國嘅「神獸」就睇淡佢哋，之前準確預測頭2輪戰果嘅「猩猩預言家」禾達，就貼瑞士贏波，而法蘭克福動物園嘅紅河豬就估計係「悶和」。

多蒙特動物園嘅35歲猩猩禾達，頭兩場都貼中德國贏波，不過今次對瑞士，禾達就選擇裝有瑞士頸巾嘅鐵桶，發言人表示：「禾達對德國有啲不滿，佢嘅預測好明顯，覺得瑞士會贏波。」

德國對瑞士會喺法蘭克福上演，當地動物園就派出紅河豬Abby預測，佢哋分別整咗兩個有德國國旗同瑞士國旗嘅龍門，但Abby推波去到龍門口嗰陣，突然停低唔郁，最終兩個龍門都冇「射入」。動物園發言人Sabrina話：「我哋有兩隻紅河豬Abby同Helene，之前熱身賽已經搵佢哋測試，Abby預測100%成功，所以搵佢做正選，我哋之後都有搵Helene『入替』，佢都冇貼任何一隊贏，所以會係和波。」