紅軍孖寶「隊長內訌」　蘇保斯拉爾破64年紀錄

歐國盃A組最後一輪賽事，蘇格蘭對匈牙利，雙方隊長安德魯羅拔臣、蘇保斯拉爾同樣效力利物浦，成為今場一大焦點。蘇保斯拉爾更加係歐國盃創辦64年以來最年輕隊長，呢位進攻中場平時同安德魯羅拔臣喺紅軍並肩作戰，罕有可以喺球場上各為其主交鋒，到底邊位技勝一籌，實在令人期待。

利物浦成為今屆歐國盃隊長大戶，除咗蘇保斯拉爾、安德魯羅拔臣之外，中堅華基爾雲迪積克亦係荷蘭隊長。當中以蘇保斯拉爾最威水，佢喺首輪分組賽對瑞士刷新紀錄，以23歲零7個月21日成為歐國盃史上最年輕隊長，該仗佢貢獻1次助攻，可惜最終仍然輸1比3。

蘇保斯拉爾表示，可以獲此成就，要多謝領隊馬高羅斯信任，安德魯羅拔臣識英雄重英雄，大讚蘇保斯拉爾有領袖風範，踢法極具侵略性，會要求蘇格蘭隊友嚴密看管呢位新星。