11次撲救創紀錄　格魯吉亞門神等入豪門

格魯吉亞同捷克喺歐國盃F組激戰踢成1比1，兩隊鬥攻戰況激烈，捷克一共錄得12次中目標攻門，但就成為歐國盃史上「中龍」攻門最多而贏唔到嘅球隊，事關馬馬達舒維利作出近20年最多嘅11次撲救，成為格魯吉亞搶分英雄。

格魯吉亞史上首戰歐國盃，第2場波就拎到歷史性第1分，馬馬達舒維利全場高擋低接救出11球，成為自2004年拉脫維亞嘅高連高後(對荷蘭12次撲救)，歐國盃近20年單場最多撲救門將，賽後獲選為最佳球員實至名歸。

數據顯示11次撲救入面有6次係喺禁區內射門，捷克今仗預期入球(xG)高達3.11球，意味馬馬達舒維利阻止咗2.11個入球。翼鋒基華拉斯基利亞賽後表示：「馬馬達舒維利嘅奇迹表現幫球隊保住1分，我好慶幸有佢把關。」

23歲嘅馬馬達舒維利效力西甲華倫西亞，據報車路士同紐卡素都力斟佢加盟，呢位門將合約有8,500萬鎊買斷條款，不過消息指華倫西亞只要3,000萬鎊就會放人。