比比10秒內3次解圍　馬天尼斯：無價基因！

葡萄牙喺歐國盃2連勝提前出線，41歲嘅中堅比比繼續刷新佢歐國盃史上最老上陣球員紀錄，而且佢嘅表現亦持續堅挺，今仗曾經10秒內3次頭槌解圍，領隊馬天尼斯都大讚佢嘅足球基因「有錢都買唔到」！

比比今場繼續正選上陣，防守穩如泰山，首仗對捷克佢有全場最高嘅11次搶贏球權，今仗佢又錄得全場最高嘅7次解圍，喺20分精彩包抄瓦解對方單刀。葡萄牙尾段主守保勝果，79分鐘喺土耳其角球攻勢，比比竟然10秒內3次將對方連環傳中頂走，相當犀利。

葡萄牙領隊馬天尼斯賽後表示：「比比係職業球員典範，佢每日24小時都係為足球而活，多數球員會有2個鐘頭去準備比賽，但比比係所有生活細節都做緊，佢嘅身體基因係有錢都買唔到！」