7項數據第1　迪布尼罕見激動情緒大爆發

比利時喺歐國盃E組以2比0擊敗羅馬尼亞，保持出線希望，中場靈魂人物奇雲迪布尼踢出球王級水準，有7項數據屬於全場第1，呢位即將33歲嘅老將入波之後，更加罕見激動情緒大爆發慶祝，可見佢真係搏晒老命。

奇雲迪布尼今場表現近乎完美，根據OPTA統計，佢有5次射門3次中目標，17次同對手對抗有12次成功，4次扭過對手，3次長傳都成功交畀隊友，進攻三區傳球23次、4次搶斷、4次令對手犯規，呢7項數據都係全場球員之冠。賽後歐洲足協亦將今場最佳球員獎頒畀奇雲迪布尼，大讚佢令比賽變得唔同，成為球隊關鍵先生。

除咗數據之外，奇雲迪布尼亦踢出激情，上半場18分鐘由中場線開始個人突破，殺到禁區頂妙傳盧克巴基奧射門，簡直有美斯顛峰時期水準。奇雲迪布尼80分鐘接應門將卡斯迪爾斯長傳，力壓對方守將射入，被指比盧卡古更勝任中鋒角色。

一向冷靜嘅奇雲迪布尼入波之後瘋狂慶祝，可見佢當今場係決賽咁踢，賽後佢表示，仲未打算退出國家隊，鬥心一流。