利亞奧創造樣衰紀錄　正選地位難保

葡萄牙喺F組連贏2場出線，當C朗拿度同比比等球員不斷創造歷史，25歲嘅拉菲爾利亞奧就喺歐國盃留下樣衰污點，佢成為歐國盃史上首個單屆2度因「插水」而食黃牌球員，下場賽事將要停賽。葡萄牙攻擊線人才濟濟，拉菲爾利亞奧隨時保唔住個正選席位。

拉菲爾利亞奧首戰對捷克，喺39分鐘插水博12碼被罰黃牌，該仗成為率先被換走嘅球員。今仗對土耳其，再一次揀喺39分鐘插水，結果半場就被柏度尼圖入替。呢位AC米蘭前鋒因2次插水食黃牌而要喺下場停賽，係歐國盃歷史上第1人。

葡萄牙下場變例行公事，好大機會收起一班主力，拉菲爾利亞奧停賽本來無傷大雅，不過佢作為球隊前鋒最「唔穩陣」一員，又有柏度尼圖、祖奧菲歷斯、迪亞高祖達等猛將吼實佢個位，如果下場有球員成功上位，拉菲爾利亞奧去到淘汰賽隨時會變後備。