劉舜文：DANKE！維丹費拿！

DANKE呢句德文，廣東話發音近似｢丹卡｣，意思即係多謝咁解！

不經不覺今次歐國盃採訪團，已經嚟到尾聲。雖然每日睡眠時間都嚴重不足，不過收穫甚豐，亦有好多人需要多謝，包括前德國國家隊門將維丹費拿。

話說兩個月前，小弟已經積極聯絡喺德國足球聯盟DFL工作嘅朋友，希望可以幫手搭吓路，訪問一些德國球壇名宿。不過由於球星們喺大賽期間，一般都好忙，所以早幾日收到維丹費拿接受訪問嘅消息嗰陣，我真係開心到彈起！

同維丹費拿相約喺多蒙特中央車站對面嘅「德國足球博物館」見面。結果型男門神一出現，已經被大量球迷要求合照，足見呢位鋼門喺多蒙特嘅地位。訪問過後，佢更加帶我逛下博物館，所以一定要講多聲「DANKE！維丹費拿」！

今屆德國隊連贏兩仗之後，已經提前出線，我估計球隊今仗會有個別輪換，未必排出最強陣容。對手瑞士綽號「德國B隊」，因為陣中有近20位成員，都係現役或者前德甲球員，連維丹費拿都盛讚瑞士門將恩尼森馬嘅水準。既然德國未必搏盡，話唔定實力唔差嘅瑞士，可以偷雞搶番一分。