迪馬高受傷　意大利「烏龍王」客串踢左閘？

意大利上場歐國盃0比1不敵西班牙後，再傳出不利消息，左後衞費達歷高迪馬高小腿受傷，可能缺陣周二(25日)凌晨B組最後1場分組賽對克羅地亞。根據《Football Italia》報道，領隊史巴列堤打算將上仗擺烏龍嘅中堅卡拉科利，移去左閘，頂替費達歷高迪馬高。

費達歷高迪馬高今屆歐國盃2場分組賽都擔任正選，上仗對西班牙，更踢足全場，但賽後發現小腿受傷，已缺席近日團隊操練，意大利足總發表聲明，會密切觀察呢位國際米蘭球星嘅情況。《Football Italia》指史巴列堤已為費達歷高迪馬高缺陣，制定應對方案，包括安排卡拉科利客串左閘。

22歲嘅卡拉科利出道以來，大部分時間司職左後衞，上季加盟博洛尼亞後，轉型改踢中堅，所以佢對於擔任左閘並唔陌生。雖然意大利仲有達美安、安迪亞甘比亞素可以出任左後衞，但史帥考慮到打和克羅地亞，就可以出線，所以傾向用防守力較強嘅卡拉科利踢左後衞，至於佢原本中堅位置，可能由布安基奧奴或者基安盧卡文仙尼頂上。