阿爾巴尼亞最強應援　2大女神搶鏡

每次國際大賽都會有「球迷女神」上位，今屆歐國盃亦唔例外，阿爾巴尼亞除咗國家隊表現令人眼前一亮之外，佢哋嘅女球迷亦吸引到全球目光，連續兩場都有女神降臨，令阿爾巴尼亞場內場外都咁精彩。

阿爾巴尼亞首仗對意大利，靚女體育主播Eva Murati搶晒鋒頭，呢位模特兒兼主持着住國家隊波衫兼頸巾入場，同數千球迷一齊打氣，當尼迪美巴拉美23秒閃電入波，Eva更自拍瘋狂慶祝一幕，真性情演繹贏得球迷讚賞。英國《太陽報》將佢同英國美女主播Laura Wood相比，佢嘅IG過去1星期粉絲急增，依家已有超過94.3萬粉絲。

上場對克羅地亞，輪到阿爾巴尼亞著名「性女」Erjona Sulejmani登場，37歲嘅佢帶埋囝囝一齊入場打氣，並做出「阿爾巴尼亞雙頭鷹」手勢。球迷對Erjona可能會有印象，因為佢前夫就係前瑞士國腳迪斯馬利，可惜2017年兩人離婚，向來言行大膽嘅Erjona曾經大談球員賽前性行為：「賽前性行為？足球員多數都鍾意自己搞掂！」