佐真奴慘成箭靶　意大利要靠「賭神」打救

意大利上場歐國盃不敵西班牙，領隊史巴列堤非常不滿中場佐真奴費路表現，根據意大利傳媒爆料，史帥計劃最後1場分組賽對克羅地亞，對正選人腳作出多個變動，包括用「賭神」尼高路法基奧利取代佐真奴費路。

上仗比賽過程中，史巴列堤曾經一臉怒氣，指示佐真奴費路攞波，踢完上半場就換走呢位上屆捧盃功臣，睇來對克羅地亞，佢會被貶為後備。據悉史巴列堤打算用「契仔」尼高路法基奧利擔正，呢位23歲祖雲達斯中場上年10月被意大利足總裁定違規賭波罪成，被罰停賽7個月，直至上月最後2場意甲先至復出，但仍然入選意大利名單，令人大感意外，亦反映史巴列堤非常欣賞呢位新星。

尼高路法基奧利因傷缺陣首2場分組賽，早前已傷愈復操，史巴列堤應該會重用佢。另外，前鋒施卡馬卡表現欠佳，正選位置可能被阿根廷歸化兵列迪古取代，拉素翼鋒薩卡尼有機會代替大衞法迪斯。

另外，左後衞費達歷高迪馬高小腿受傷，史帥可能將上仗擺烏龍嘅中堅卡拉科利，移去左閘，改由布安基奧奴同巴斯東尼扼守中路。