各取所需！祖記想用基艾沙換曼聯格連活特

意大利國腳費達歷高基艾沙再次同曼聯扯上關係，據《米蘭體育報》報道，祖雲達斯有意今個夏天，用呢名前鋒作為交易籌碼，同曼聯交換格連活特，如果成事嘅話絕對係「雙贏」局面。

正為意大利出戰歐國盃嘅基艾沙，有指來季並唔喺祖雲達斯新帥莫達嘅計劃之中，加上佢嘅合約2025年6月到期，令到呢名26歲前鋒有機會今夏被交易離隊。而據《米蘭體育報》報道，基艾沙好大機會加盟英超豪門曼聯。

眾所周知，祖記一直希望收購被曼聯打入冷宮嘅格連活特，但提出嘅轉會費，同曼聯要求嘅4,000萬鎊(約3.95億港元)至5,000萬鎊(約4.93億港元)有一定距離。同一時間，由於紅魔鬼一直心儀基艾沙，所以祖記就想透過基艾沙，作為交換格連活特籌碼。