【有片】米列達奧冇品踢傷隊友　不顧而去

去片睇艾達米列達奧粗野攔截加比爾馬天尼利

https://twitter.com/i/status/1803686294423212086　

巴西正在備戰美洲國家盃，將於嚟緊周二(25日)早上D組首場分組賽對哥斯達黎加，但未開波先發生「自殘事件」，中堅艾達米列達奧操練時，粗野攔截隊友加比爾馬天尼利，導致呢位阿仙奴翼鋒受傷倒地，艾達米列達奧仲要不顧而去，實在冇品。

當時巴西分隊踢練習賽，加比爾馬天尼利衝前接應傳波，遭艾達米列達奧從側邊攔截，立即痛苦倒地，米列達奧唔體諒隊友受傷之餘，仲想拉加比爾馬天尼利起身，似乎認為對方「詐死」，繼而拂袖而去。反觀加比爾馬天尼利嘅阿仙奴隊友加比爾馬加希斯，一直留喺旁邊關心馬天尼利傷勢，等軍醫入場治理。

據悉加比爾馬天尼利足踝受傷，需要軍醫扶住離開訓練場，睇來傷勢唔輕，可能無法上陣對哥斯達黎加。加比爾馬天尼利受傷過程被人影低放上社交網，網民紛紛批評艾達米列達奧出腳太兇狠，實在冇品，並指呢位皇馬中堅上季曾經因傷長抖，應該切身感受到傷患嘅可怕，冇理由咁樣對待隊友。