首名出線未必好？德國陷地獄賽區

歐國盃主辦國德國喺A組驚險首名出線，不過搶到首名又未必真係好事，事關德國將會同葡萄牙、西班牙2大勁旅處於同一賽區，甚至有機會出現英格蘭、法國、比利時加入戰團嘅局面，成為超級「地獄賽區」。

踢完頭2輪分組賽後，只有葡萄牙同西班牙鎖定小組首名，佢哋同A組首名都係同一賽區，所以對瑞士前已有傳聞，話肯定出線嘅德國會考慮走線，不過事實係德國全力出擊，並奮力逼和瑞士保住首名資格，領隊拿高斯文表示用正選出賽，係想保持球隊嘅贏波節奏。

德國16強會對C組次名，目前對手係丹麥，不過英格蘭如果最後1輪贏唔到，亦有機會跌落次名，而且同一賽區嘅D、E組次名仍然充滿變數，D組好大機會係荷蘭或者法國，E組依家第2就係比利時，全部都係名牌勁旅，德國冠軍之路將荊棘滿途。