70年不變！蘇格蘭12屆大賽同一個結局

蘇格蘭今屆歐國盃1和2負，排A組包尾黯然出局，呢個結果並唔意外，因為蘇格蘭自1954年首戰世界盃，歷來12次出戰國際大賽，全部都未能突破分組賽，今屆同樣未能打破宿命。

對匈牙利前有1分嘅蘇格蘭，贏波嘅話有機會爭次名或最佳第3名，所以今場主動搶攻，尾段史超活岩士唐喺禁區被匈牙利球員撞跌，但球證並冇示意，最後更被匈牙利絕殺輸波。蘇格蘭喺1954年首戰國際大賽，至今踢過8屆世界盃同4次歐國盃，12屆大賽都係分組賽出局。

蘇格蘭領隊奇勒賽後炮轟球證：「失球係因為我哋太想贏波，我覺得輸嗰球並唔重要，關鍵係史超活岩士唐嗰球12碼，呢個係100%嘅12碼，我想有人解釋畀我聽點解冇判，亦唔明白點解VAR介入都話唔係12碼。」