德國中堅1個受傷1個停賽　16強出邊個？

德國喺已經篤定出線情況下，照舊派出正選11人鬥瑞士，雖然最後喺力戰之下保住首名，不過付出嘅代價都唔細，雙中堅魯迪格同莊拿芬泰希齊齊「出事」，16強隨時要換晒一對中堅。

賽前有已黃牌在身嘅莊拿芬泰希，今場39分鐘因危險動作食黃牌，累積今屆第2張而自動停賽1場。更大鑊係佢嘅中堅拍檔魯迪格亦喺比賽中受傷，領隊拿高斯文賽後表示：「魯迪格嘅大腿出現問題，希望唔嚴重，要再檢查，個傷可能會好麻煩。」

莊拿芬泰希嘅位置，預計會由多蒙特中堅尼高舒洛達碧克頂上，如果魯迪格都唔踢得，史特加嘅華迪馬安頓亦要候命上場。德國依家嘅中堅問題，難免令球迷質疑：點解唔揀曉姆斯入歐國盃大軍？