C朗魅力太驚人　歐洲足協下令加強保安

C朗拿度係家陣球壇嘅萬人迷，就唔使多講，但最近多位球迷衝落球場搵偶像自拍，兼阻礙比賽節奏，搞到歐洲足協都要出手，佢哋下令要加強現場保安，以阻止球迷接近參加歐國盃嘅球員。

事實上，最近有至少6個球迷可以突破保安，走到C朗面前自拍，歐洲足協周日發聲明表示將德國嘅10個球場「部署額外嘅安全措施」，強調要加強保安，阻止球迷衝入球場，否則面臨刑事起訴，但冇透露計劃細節。

歐洲足協只係話任何侵入球場嘅行為都違反場館規則，將被驅逐出球場，甚至禁止睇歐國盃，以及有機會作出起訴。

葡萄牙周六贏土耳其3比0一戰，就有4個球迷走入球場直奔到C朗面前，賽會認為雖然佢哋只係想要影一張相，但為左保護球員，都要杜絕情況再次出現。