荷蘭新星名大於實？傳奇狠批沙維西蒙斯

荷蘭近年有唔少新星彈起，21歲嘅沙維西蒙斯最受注目，不過佢頭2場分組賽表現一般，早前被荷蘭傳奇雲漢尼根炮轟佢太個人主義，直斥沙維西蒙斯：「當自己踢緊學界！」

沙維西蒙斯首仗以正選右翼上陣，表現非常差勁，踢咗1個鐘頭就被換走；上場對法國曾入詐胡，到73分鐘又被換走。曾協助荷蘭贏74年世盃亞軍、76歐國盃季軍嘅雲漢尼根，依家80歲一樣咁好火：「沙維西蒙斯每次拎波，都覺得自己可以主宰成個歐國盃。佢將簡單事情複雜化，成日失去控球權，我仲好唔鍾意佢每次跌低都係咁碌，扮到好似嚴重受傷咁。」

沙維西蒙斯效力巴黎聖日耳門(PSG)，上季被外借去德甲RB萊比錫表現出色，據報曼聯、阿仙奴、巴塞隆拿都有興趣將佢羅致，不過PSG只願意將佢外借，仍然視佢為未來組軍重要成員。