涉挑民族仇恨　阿爾巴尼亞前鋒罰停賽兩場

阿爾巴尼亞喺歐國盃B組第2場分組賽，同克羅地亞踢成2比2平手，只要周二（25日）凌晨對西班牙有分落袋，仲有機會爭出線。不過前鋒達古（Mirlind Daku）因為上場賽後，涉嫌以「大聲公」向球迷挑起民族仇恨，被歐洲足協罰即時停賽兩場。

效力俄超魯賓卡山前鋒達古，喺上場對克羅地亞尾段後備入替，完場後被指攞住「大聲公」向球迷爆粗，羞辱同屬巴爾幹半島國家塞爾維亞、馬其頓，涉嫌煽動球迷挑起民族仇恨，被歐洲足協立案調查。

最終歐洲足協周日發出聲明，確認達古被罰即時停賽兩場，意味住佢隨時緣盡今屆歐國盃。而除咗達古罰停賽，阿爾巴尼亞仲因為有球迷燃點煙花，同埋衝入球場，需要罰款4.75萬歐元。