雲佬即將重返曼聯　做坦哈格副手

曼聯留用坦哈格後，正在重建教練團，其中麥卡菲離隊後嘅助教空缺要搵人頂替，據報新助教人選，就係踢過曼聯嘅荷蘭名宿雲尼斯達萊。

多間傳媒報道，47歲嘅「雲佬」正同曼聯談判，進展順利，「雲佬」將會擔任坦哈格副手，並且將會長期合作，稍後曼聯高決策層可能同坦哈格續長約。

「雲佬」於2001至06年效力曼聯，上陣210場入150球，贏過1屆英超冠軍，掛靴後開始執教，做過荷蘭國家隊助教，燕豪芬青年隊同1隊，2023年離開燕豪芬後一直無業，但唔少球會都有意搵佢執教，包括今季降班嘅般尼。

在坦哈格獲留任之前，教練團另一成員麥卡倫率先獲高層續約，據報麥卡倫不但係費格遜遺臣，更係現任曼聯總監巴斯福特好友，後台夠硬，而「雲佬」雖來自荷蘭，但亦可算係曼聯舊朝時代嘅人，坦哈格要同呢班人合作，難度都唔細。