悲情莫迪歷來回地獄：由我體現足球嘅殘酷！

克羅地亞喺今屆歐國盃充滿悲情，連續2場喺補時5分鐘同補時8分鐘失波被逼和，傳奇莫迪歷今仗對意大利來回地獄，先係主射12碼宴客，轉個頭入波以為可以做英雄，點知最後一刻頂唔住失分，出線只剩數字上機會。今仗極可能係38歲嘅佢歐國盃最後一戰，莫迪歷悲痛表示：「由我體現足球嘅殘酷！」

首戰對西班牙吞3蛋，上場克羅地亞喺95分鐘慘被阿爾巴尼亞逼和2比2，莫迪歷完場後黯然坐喺地上一幕，令球迷心碎。今場可能係莫迪歷歐國盃終極一戰，佢亦施展渾身解數，下半場射失12碼後，佢喺門前射入成為歐國盃史上最老入球者(38歲289日)，尾段被換出後佢亦肉緊喺場邊指揮，可惜再一次「臨尾香」。莫迪歷賽後獲選為最佳球員，領獎一刻難掩悲痛之情。

莫迪歷賽後失望表示：「我唔知講乜，克羅地亞一直奮戰到最後一刻，但足球並冇向我哋展示仁慈。我哋要知道點樣跌倒、點樣面對失敗，我知道呢個唔係安慰，足球本身就係殘酷，今次由我哋再去體現。」莫迪歷表明會繼續比賽，暫時冇退役打算。