薩卡尼處子球載史冊　複製偶像迪比亞路經典

意大利喺補時8分鐘嘅入波，戲劇性逼和克羅地亞拎到次名出線權，賽前冇太多人估到29歲嘅薩卡尼會成為絕殺英雄，呢個入波係佢喺國家隊嘅「處子球」，而且仲係複製偶像迪比亞路嘅經典士哥，認真威水！

效力拉素嘅薩卡尼承認自己最初連入選大軍都唔肯定，之前6次上陣亦冇入過波，今場佢喺81分鐘後備上陣，去到補時最後一刻作出致命一擊，97分19秒係意大利歐國盃史上最遲入球。薩卡尼賽後興奮表示：「我個腦出現好多畫面，真係好激動。講真我唔知個入波係最後一刻，拎到波之後我諗都唔諗就射，之後就有一大堆人將我壓住！」

薩卡尼喺左路熨射遠柱網頂，另人回憶意大利喺06世界盃4強對德國，迪比亞路喺加時嘅經典入波，薩卡尼表示：「迪比亞路一直係我偶像，細細個已經貼佢張海報喺房，飛德國前佢曾經入營探班，最近亦有喺社交網傾過，真係好興奮！」