巴西狂攻食白果被悶和　尼馬冇眼睇

周二(25日)早美洲盃D組賽事，冠軍熱門巴西表現令人失望，全場狂攻下被哥斯達黎加悶和0比0，連看台上睇波嘅尼馬都「冇眼睇」，多次掩面歎息。

巴西今場派出雲尼斯奧斯祖利亞、洛迪高高斯同拉芬夏比洛尼進攻，夏天加盟皇家馬德里嘅恩迪克亦後備上陣，以17歲339日成為巴西史上最年輕出戰美洲盃球員。巴西呢條皇馬+巴塞鋒鋒線卡士就夠，但巴西全場19次攻門只得3次命中目標，但盧卡斯柏基達射中柱，馬昆奴斯入波又食詐胡，最終被控球率只得26%嘅哥斯達黎加悶和。

巴西上一次喺美洲盃首仗和0比0，係2016年同厄瓜多爾打和，當年佢哋就喺分組賽出局，而當屆美洲盃主辦國又係美國。同組另一場賽事，哥倫比亞憑占士洛迪古斯交出2次助攻，以2比1擊敗巴拉圭，旗開得勝。